O PP de Ames logra que o Goberno local reaccione e anuncie o saneamento para Tapia e Piñeiro tras anos de parálise

O Grupo Municipal do Partido Popular de Ames amosou a súa satisfacción despois de que o goberno local anunciase o inicio da redacción dun proxecto de saneamento para as parroquias de Tapia e Piñeiro, unha decisión que chega poucos días despois de que os populares presentasen unha moción no Pleno reclamando actuacións inmediatas nestas zonas do municipio.

Segundo sinala o PP, esta reacción do Executivo municipal prodúcese tras a presión exercida polo grupo popular e despois das reunións mantidas cos veciños da zona, que trasladaron a súa preocupación pola falta de saneamento e polas consecuencias que esta situación ten na súa vida diaria.

A portavoz do Partido Popular de Ames, Oliva Agra, participou recentemente nun encontro cos veciños de Tapia dentro da rolda de visitas que a formación está a realizar polas diferentes parroquias do municipio.

“Nesta xuntanza, a reclamación foi clara: o saneamento non pode esperar máis. Comprometémonos a levar a súa voz ao Pleno de xeito inmediato e así o fixemos”, explicou Agra.

Unha reacción tras a iniciativa do PP

Desde o grupo popular consideran que o anuncio do goberno municipal —coñecido a través dunha visita do alcalde e do concelleiro de Obras á zona— é unha reacción directa á iniciativa presentada polo PP.

Segundo explican os populares, durante esa visita anunciouse a instalación de novas fosas sépticas e a mellora das existentes en diferentes puntos, como na Rúa e Fernande, medidas que consideran insuficientes se non se acompañan dun proxecto global de saneamento.

Para o PP, a situación actual evidencia unha falta de planificación durante anos por parte do goberno municipal.

“O acceso á auga potable e ao saneamento non é un luxo, é unha obriga legal e unha cuestión de dignidade básica para os nosos veciños”, sinalan desde o grupo municipal popular.

Máis dunha década sen solucións

Os populares lembran que o PSOE leva gobernando Ames de forma ininterrompida desde o ano 2015, polo que consideran que existiu tempo suficiente para resolver unha carencia que afecta directamente á calidade de vida dos veciños destas parroquias.

Máis de dez anos de responsabilidade directa son tempo máis que suficiente para ter resolto un problema que segue afectando á vida diaria de moitas familias.

O PP pide compromisos concretos e prazos

A pesar de valorar positivamente que o goberno local comece a moverse nesta cuestión, o Partido Popular advirte de que non aceptará anuncios sen concreción.

Por iso, a moción presentada polo grupo popular inclúe varias esixencias claras ao Executivo municipal:

• A presentación nun prazo máximo de tres meses dun plan técnico e económico para o saneamento e abastecemento en Tapia e Piñeiro.
• A publicación dun cronograma real das obras, indicando fases, financiamento previsto e datas de inicio e finalización.
• A inclusión de partidas específicas nos orzamentos municipais para garantir que o proxecto se execute.
• A elaboración dun informe trimestral ao Pleno sobre o estado de execución do proxecto.

“É positivo que o Goberno esperte, pero un anuncio no aire non abonda. Os veciños necesitan un cronograma real, orzamento e prazos por escrito”, conclúe Oliva Agra.

DESCARGA A NOTA DE PRENSA