O PP leva ao Congreso a humanización do Milladoiro e pide explicacións polas deficiencias da obra

O PP leva ao Congreso a humanización do Milladoiro e pide explicacións polas deficiencias da obra

Ames, 6 de febreiro de 2026.– O Partido Popular levou ao Congreso dos Deputados a humanización do Milladoiro tras non obter resposta do goberno municipal ás solicitudes de información sobre a execución e recepción da obra, financiada con fondos europeos Next Generation.

Segundo informou o PP de Ames, o pasado 13 de xaneiro solicitaron ao Concello unha copia do informe de deficiencias detectadas remitido polo Ministerio de Transportes, Mobilidade e Axenda Urbana. Ademais, presentaron un escrito solicitando copia das achegas realizadas polo Concello durante a redacción do proxecto.

O grupo popular asegura que non recibiu resposta a ningún destes requirimentos.

Visita ao Milladoiro para comprobar o estado da obra

Ante esta situación, os populares recorreron aos seus deputados no Congreso para formular unha batería de preguntas ao Goberno central. Neste contexto, a deputada Marta González visitou o Milladoiro para comprobar o estado das obras de humanización da principal vía do núcleo urbano.

A obra foi recibida o 29 de decembro de 2025 e presenta, segundo o PP, as seguintes incidencias:

• Marquesiñas con problemas de accesibilidade.
• Semáforos fóra de servizo durante longos períodos.
• Deficiencias no acabado das beirarrúas.
• Carril bici sen sinalizar e ocupado por vehículos.
• Problemas coa localización dos contedores de residuos.
• Sinalización deficiente e falta de control do tráfico, xerando molestias á veciñanza.

Rotonda de acceso ao polígono industrial

O PP tamén pon o foco na actuación prevista na rotonda de acceso ao polígono industrial do Milladoiro, aprobada provisionalmente o 9 de novembro de 2023, que non foi executada nin conta cun calendario para as expropiacións necesarias, pese a transcorrer máis de dous anos desde a súa publicación no Boletín Oficial do Estado.

Preguntas rexistradas no Congreso

Os deputados do PP pola provincia da Coruña —Marta González, Miguel Tellado, Tristana Moralejo e Álvaro Pérez— xunto co deputado Héctor Palencia, membro da Comisión de Transportes do Congreso, rexistraron preguntas dirixidas ao Goberno.

Solicitan aclaracións sobre os controis técnicos realizados, a responsabilidade na recepción da obra, a posible apertura de expedientes, os prazos e orzamentos para corrixir as deficiencias detectadas e as garantías para evitar que se repitan situacións similares en actuacións financiadas con fondos europeos.

Descarga a nota de prensa.