O Partido Popular de Ames rexistra unha proposta para o pleno do vindeiro 28 de xaneiro co fin de restituír a liña de Ortoño, xa que tan só é unha cuestión económica tal e como declarou o alcalde de Santiago.

•  O PP solicita a reserva dunha partida económica para os custes da restitución, a colaboración entre administracións e a axuda administrativa e técnica da Consellería de Infraestruturas e Mobilidade.
•  As declaracións do Alcalde de Santiago dicindo que «estaría dispuesto a dialogar y colaborar», certifica a desidia do Alcalde de Ames que non moveu un dedo para salvar a liña.

Ames, 16 de xaneiro de 2021.

O Partido Popular de Ames acaba de rexistrar unha proposta para restituír a liña de Ortoño mediante a firma dun convenio con Santiago de Compostela e a colaboración da Consellería de Infraestruturas e Mobilidade da Xunta de Galicia como a única vía de restaurala a curto prazo. A proposta conta de seis puntos:

1. Que coa máxima prioridade se inicien os trámites co concello de Santiago para chegar a un acordo de restitución inmediata da liña a Ortoño.
2. Tendo en conta que a Consellería de Infraestruturas e Mobilidade xa manifestou a súa total disposición, tanto en medios técnicos como administrativos, para a adecuación dos servizos de transporte urbano ás necesidades da veciñanza, convocar unha reunión a tres entre a Consellería, o Concello de Santiago e o de Ames co fin de resolver as posibles incidencias que poidan xurdir e para axilizar a solución.
3. Reservar unha partida económica suficiente para facer fronte ao custes da restitución desta liña.
4. Convocar unha reunión coa veciñanza co fin de que acheguen proposta de ampliación e mellora desta liña.
5. Que o Alcalde-Presidente da corporación informe cada semana aos voceiros municipais dos progresos acadados.
6. Dar traslado desta proposta ao Concello de Santiago, a Consellería de Infraestruturas e Mobilidade e a veciñanza afectada.

Esta proposta será debatida no vindeiro pleno do 28 de xaneiro e, de ser aprobada, posibilitaría a firma dun convenio que faría posible a restitución do servizo a curto prazo, xa que segundo as declaracións realizadas polo Alcalde de Santiago, a cuestión é tan só un problema económico cifrado no entorno dos 80.000 euros.

O Alcalde Compostelán destacou que «estaría dispuesto a dialogar y colaborar«, o que proba definitivamente o que dicía o Grupo Popular, que o alcalde socialista de Ames non moveu nin un só dedo para evitar a desaparición desta liña e que sabía desta cuestión, al menos, dende o ano 2017.

O Alcalde de Santiago comparou a liña de Ortoño coa dos Tilos, no veciño concello de Teo, tal e como se fixera tamén o Partido Popular, facendo fincapé en que a única diferenza entre ambas é a rendibilidade económica cifrada en 80.000 euros.

As declaracións do alcalde Bugallo deixan de novo en evidencia ao alcalde de Ames ao afirmar o primeiro que “estaría dispuesto a dialogar y colaborar”, polo que se deduce que ata o de agora non houbo ningún diálogo, e que a restitución desta liña pasa por unha aportación económica  do concello de Ames que roldaría os 80.000 euros, segundo manifestou o propio alcalde de Santiago.

En definitiva si o concello de Santiago está disposto a “dialogar y colaborar” e si a Consellería de Infraestruturas e Mobilidade, como xa manifestou, está disposta a prestar todos os seus medios técnicos e administrativos dos que dispoñen, tan só falta que o Alcalde de Ames se poña a traballar na materia pendente que, como mal alumno, deixou para a convocatoria extraordinaria de febreiro.