O goberno socialista de Ames incapaz de aprobar o Inventario Municipal de Bens e Dereitos rematado no ano 2014. Segue utilizando o documento do século pasado (1997). 

• O Alcalde de Ames leva incumprindo a legalidade dende o ano 2015 e vulnera por segunda vez a normativa que obriga a renovar o documento cada vez que cambia a corporación.
  
• A non actualización deste documento impide determinar a valoración correcta dos Bens e Dereitos do Concello, así se reitera constantemente dende a Secretaría Xeral.

Ames, 25 de novembro 2020

O desleixo do goberno tripartito de Ames, o máis caro e con máis dedicacións exclusivas da historia, volve a quedar retractado cun tema que non e menor, a falta de actualización do Inventario Municipal de Bens e Dereitos, o que supón seguir utilizando o documento do século pasado (1997) que está totalmente desfasado; os novos Bens e Dereitos municipais estanse incorporando ao obsoleto Inventario Municipal vixente mentres non se aprobe o novo.

O novo inventario quedou rematado pola corporación Popular no ano 2014 e a súa elaboración supuxo un investimento considerable para as arcas do concello, ademais do esforzo realizado por moitas persoas. Convén recordar que a actualización do inventario municipal de bens e dereitos comezouse a abordar en marzo de 2010 (goberno socialista), fora encargado a unha empresa e tras dun largo período de traballo, o devandito inventario foi entregado en soporte dixital e en papel o 16 de decembro de 2014, apenas seis meses da constitución da nova corporación presidida polo alcalde socialista José Miñones que incluso chegou a presumir del.

En xullo de 2015 publicouse na web municipal e comezou un prazo de exposición pública de 15 días, en setembro dese mesmo ano o Goberno comeza unha rolda de visitas polas parroquias para amosar o inventario municipal e a partir de aí nada máis se soubo, o goberno decide metelo nun caixón e ata hoxe.

Con esta forma de proceder o alcalde socialista José Miñones, que se comprometera a levalo ao Pleno da Corporación para a súa aprobación antes de que rematara o seu primeiro mandato, non só está incumprindo o seu compromiso, tamén está deixando de cumprir unha obriga legal marcada claramente no ordenamento xurídico vixente en canto a obrigatoriedade de actualizalo anualmente e a obriga de comprobalo cada vez que muda a Corporación Municipal.

O documento rematado no ano 2014 recolle a relación de todas as propiedades municipais, a valoración patrimonial e contén un listado dos inmobles urbanos, rústicos, dereitos reais, mobles, créditos, valores mobiliarios e un longo etc.

En xullo de 2017, co obxectivo de ter coñecemento sobre a efectiva actualización do inventario municipal, o Grupo Popular solicitou ao Tripartito de Ames a relación de bens e dereitos que se incorporaran ao patrimonio municipal a partir de decembro de 2012, independentemente da súa alta no Inventario Municipal, negando esa información aos concelleiros populares.

En definitiva, o desleixo do alcalde socialista de Ames, o mellor pagado da contorna, négase a actualizar o inventario e provoca, por unha parte un prexuízo económico ao concello, que pagou por un servizo que non se aproveita, e pola outra, un prexuízo na xestión, actualización e disposición dun documento esencial que está perfectamente regulado e que debería ser o fiel reflexo do patrimonio de Ames, unha cuestión que está sendo advertida constantemente dende a Secretaría Xeral do Concello.