O Goberno populista de Ames fixo unha manipulación descarada do pleno extraordinario no que se aprobou a Conta Xeral por unanimidade apropiándose dun mérito que non lle corresponde, como ven sendo habitual.
A conta Xeral é un documento técnico anual de carácter obrigatorio presentado pola intervención municipal que o goberno tripartito pretende aproveitar en beneficio propio utilizando datos xesgados no seu beneficio. Partido Popular e Pacto x Ames votaron a favor do documento técnico que era o que se propoñía no Pleno Extraordinario, non a xestión dun goberno que aproveita calquera situación para apropiarse de méritos que non lle corresponden.
A análise da conta xeral reflicte eivas sen precedentes nos últimos 10 anos xa que a porcentaxe de execución dos investimentos está lonxe da media dos últimos 10 anos.
No apartado de investimentos, o goberno populista soamente investiu 2.298.000€ dos case 5.600.000 € que tiña consignado no orzamento. E dicir, de cada 100 € que tiña para inversións, tan só foi capaz de xestionar 43,6€.
Outra cuestión que non é menor, que indica a ineficacia dos populistas é o remanente de tesourería que excede dos 4.800.000€, xa que, non foron capaces de xestionar este saldo positivo conseguido grazas ao Plan de Axuste aprobado no ano 2012 polo Partido Popular.
Neste caso é conveniente lembrar que cando o Partido Popular gañou as eleccións con maioría absoluta no ano 2011, atopouse un concello cun remanente de Tesourería negativo de -2.170.000 €,e tivo que aprobar de urxencia un plan de axuste para frear unha situación que tiña ao concello practicamente en quebra técnica.
Este dato contrasta claramente coa situación do concello catro anos despois, no 2015, cando a coalición de PSOE-PODEMOS-BNG formaron goberno encontrándose unhas contas totalmente saneadas e con un remanente de tesourería de+ 3.313.000 € grazas a un Plan de Axuste que, por certo, os socialistas, con José Miñones de voceiro, e antes no goberno, votaron en contra deste Plan de Axuste do que agora se aproveitan e que permitiu acadar cifras positivas e reducir a débeda.
O máis incoherente desta situación é que, o Alcalde socialista de Ames, agora presume de ter débeda cero grazas a o Plan de Axuste aprobado polo Partido Popular e que curiosamente o daquela voceiro dos socialistas José Miñones, votou en contra deixando as claras as súas contradicións.
Por se isto fora pouco, presumir de débeda cero é unha absoluta irresponsabilidade, demostrando que non teñen capacidade de xestión e que non teñen o máis mínimo equilibrio, nin a débeda alta nin a débeda cero son indicativos de boa xestión, todo o contrario.
Chama a atención como un concello como Ames, con innumerables necesidades, se permita o luxo de ter “gardado nunha caixa” a cantidade de 8.167.804 € (3.293.950 correspondente a investimentos e 4.873.854 do remanente de tesourería positivo).
© Grupo Municipal Popular de Ames 2018 - Diseño web Chia na rede