O PP de Ames reclama un contrato temporal para garantir a continuidade do servizo deportivo da Telleira

O Grupo Municipal Popular pide ao goberno local que adopte de inmediato unha solución transitoria que evite calquera interrupción no funcionamento das instalacións deportivas da Telleira e ofreza seguridade tanto ás persoas usuarias como aos traballadores do servizo.

O Partido Popular de Ames presentou unha moción para o seu debate no próximo Pleno municipal na que insta ao executivo local a garantir a continuidade do servizo deportivo que se presta nas instalacións municipais da Telleira, ante a proximidade do remate da actual concesión.

A concesión vixente foi adxudicada no ano 2006 e, desde entón, acumulou catro prórrogas sucesivas. A última delas finalizará o vindeiro 9 de setembro de 2026, polo que resulta imprescindible adoptar medidas que permitan manter a actividade deportiva mentres se tramita a futura concesión das instalacións.

Planificación e responsabilidade

Desde o PP de Ames lembran que a Telleira leva preto de dúas décadas prestando servizo á veciñanza, consolidándose como unha infraestrutura deportiva de referencia no municipio e desempeñando un papel fundamental na práctica deportiva, na conciliación familiar e na vida social de centos de persoas.

Os populares advirten de que a preparación da futura concesión require informes técnicos, económicos e administrativos complexos, ademais da elaboración dos pregos e da correspondente tramitación contractual. Por este motivo, consideran necesario actuar con previsión para evitar que os prazos administrativos poidan xerar situacións de incerteza.