O Alcalde en funcións, José Miñones, e os seus compañeiros de goberno, presentaron onte a nova páxina web do Concello de Ames. Unha nova plataforma que lonxe de abrir a fiestra á veciñanza e comunicar, na súa presentación, mostra á perfección a forma coa que finalizou o mandato o Goberno, que é como o comezou. Con carencias, co traballo a medio facer e sempre buscando o beneficio a un Cuatripartito, que a dous días da toma de posesión, xa podemos afirmar que se atopa en perigo de extinción, aínda que todavía podemos levar algunha sorpresa cos pactos ocultos que se están a levar no consistorio.
Na propia portada, aínda que figura o apartado que inclúe as axendas dos Concelleiros así como do propio Alcalde, carece xa de contido. Unha cuestión que non vén dada pola novidade da páxina, senón que os populares xa denunciaran en diversos Plenos Municipais o ocultismo que tiña o Tripartito en canto á súa actividade semanal.
Pero sen dúbida, tamén estamos a falar dunha páxina web que non comunica. Un feito que se pode comprobar ao acceder, xa que só está dispoñible en galego, pero en castelán non hai a disposición da veciñanza ningún tipo de contido.
Pero se cabe, o maior exemplo de vanidade o temos cando consultamos os representantes municipais, é dicir, os Concelleiros. O Goberno conta coa súa fotografía e biografía, mentres a oposición ten que conformarse con tan só a declaración de bens. Cun texto de proba da páxina web e sen fotografía. Aínda que os populares entenden que a dous días da propia toma de posesión non tería moito sentido presentar este apartado, recordan que a propia páxina leva meses en construción e, polo tanto, non debería terse permitido esta discriminación aos representantes da oposición.
Por último, cabe indicar que todos os erros volven ter unha explicación lóxica, que podemos respostar facéndonos a seguinte pregunta: ¿Todo vale a cambio dunha última fotografía? Pode que nada fose casualidade. Pode que esteamos a falar dunha despedida ou dunha declaración de intencións. Na fotografía aparecen o Alcalde socialista en funcións José Miñones e os dous Concelleiros do BNG, David Santomil e Isabel Vaquero, Concelleira en funcións de comunicación.
Resulta curioso o traballo a medio facer, as présas e que o Concelleiro de Educación, que pouco ten que ver coa construción dunha páxina web, apareza na fotografía coa que presentan o novo portal. Un feito que os populares entenden como unha declaración de intencións do traballo feito en conxunto polo PSOE e BNG, partidos que en conxunto sumarían a maioría do Pleno, abrindo así unha nova páxina na historia de Ames, esta vez cun bipartito.