Vencemento contrato lixo Ames

Os Socialistas de Ames deixaron vencer o contrato do lixo coa Mancomunidade Serra do Barbanza dende 2015 e a veciñanza carece dun modelo efectivo

• O servizo cústalle á veciñanza más dun millón de euros ao ano, e reciben un servizo moi deficiente, agora empeorado coa folga

• A pesar de que Ames aporta máis do 40%, os camións son insuficientes, vellos e non cumpren todos os itinerarios, sobre todo no rural

Ames, 9 de decembro de 2019

A imaxe dos contedores cheos de lixo en Ames, independentemente da folga convocada esta ponte polos traballadores da Mancomunidade Serra do Barbanza, comeza a ser algo habitual no noso Concello. A realidade é que en Ames, o servizo de recollida e tratamento de residuos, un servizo que custa máis dun millón de euros anuais, ven funcionando dende hai anos de forma moi deficiente e, a pesares das deficiencias, a situación prorrógase no tempo sen que o goberno socialista tome unha decisión sobre o modelo de recollida e tratamento de residuos urbanos é o que precisa Ames.

Vencido no ano 2015 o contrato entre Concello de Ames e Mancomunidade Serra do Barbanza, e estando actualmente en situación de prórroga tácita, os socialistas non tomaron a día de hoxe decisión algunha sobre se prorrogar o convenio que une Ames coa Mancomunidade integrándose na mesma como membro de pleno dereito ou, pola contra, cambiar de alternativa e optar por asinar con SOGAMA.

Ata a data, a diferenza principal entre ambos modelos, Mancomunidade e SOGAMA, consistía na aposta de Serra do Barbanza pola compostaxe; pero, na actualidade, SOGAMA incorporou tamén a compostaxe a todos aqueles concellos que se atopen a unha distancia de 45 km do complexo de Cerceda. Motivo polo que o Concello de Ames podería tentar adherirse, ao estar dentro do límite de distancia fixado.

Outra cuestión a tratar na opción de SOGAMA está na recollida e transporte dos residuos, polo que o goberno do señor Miñones, que tamén demora dende hai anos a licitación do servizo de limpeza viaria, podería plantexarse a posibilidade de contemplar a licitación conxunta de ambos servizos.

Pola súa banda, os Populares levan interesándose en varias ocasións polo asunto debido á deficiente recollida, ao insuficiente número de camións que realizan o transporte dos residuos sólidos, ao estado lamentable no que se atopan debido á súa antigüidade e ao incumprimento reiterado nas frecuencias que realiza a recollida e, instaron ao goberno a tomar unha decisión; decisión que os socialistas dilatan facéndoa depender de diversos estudos. En febreiro do ano 2018, o goberno encargaba un novo estudo económico sobre o custo que suporía enviar o lixo á planta da Mancomunidade. De igual forma, os socialistas anunciaron que encargaran outro informe, neste caso xurídico, co fin de despexar todas as incógnitas legais e coñecer as alternativas para regularizar a situación.

Xa en agosto do mesmo ano, o Grupo Popular solicitou información para coñecer se existía xa unha proposta definitiva presentada pola Mancomunidade para que Ames se integrase como membro de pleno dereito. Tamén solicitou o informe xurídico para despexar esas incógnitas legais e coñecer as alternativas para regularizar a situación; así como a información sobre o estudo económico actual e a comparación con SOGAMA.

De todo o solicitado, os Populares tan só recibiron un estudo económico de ambos modelos, no que se contemplan determinadas estimacións ante a falta de información de datos reais, e no que prorrogar as condicións actuais do contrato coa Serra do Barbanza é a opción máis económica. Desta forma, Ames debera incorporarse, polo tanto, como socio de pleno dereito da citada Mancomunidade; situación que faría de Ames, dado o número de habitantes, que supón case o 40% do total da mancomunidade, pasara a ser o principal socio e, por tanto, o concello que máis tería que contribuír ao sustento da propia Mancomunidade. Un inconveniente que habería que sumar á conflitividade existente entre Mancomunidade e a concesionaria, cuxo contrato remata en 2023 e, ao feito de que, segundo a última auditoría encargada pola Mancomunidade, o alto volume de residuos que remata no vertedoiro supera amplamente os obxectivos dunha planta de reciclaxe e compostaxe.

Sobre a outra opción, de enviar os residuos á planta de SOGAMA, o estudo revela como o custe do tratamento sería aproximadamente un 30% máis económico; non obstante, habería que engadir os custes derivados da pre-recollida, contenerización, mantemento, lavado e desinfección periódica dos contedores, así como a recollida selectiva e o transporte ao complexo de Cerceda; estudo de custes que, sorprendentemente, parece que non se encargou realizar á empresa consultora, o que manifesta, unha vez máis, a incompetencia dos Socialistas á hora de fixar obxectivos nos estudos e informes que contrata.

Por último e, por todo o exposto, o que pon de manifesto o goberno socialista de Ames, é que ao longo do seu mandato non foi quen de obter a información precisa, a pesar de contar con medios suficientes, para tomar unha decisión sobre a recollida de lixo e a limpeza viaria e, mentres a situación se demora indefinidamente, o Alcalde Miñones volta á inacción e a veciñanza continúa padecendo as deficiencias do servizo.