Perda subvención «Plan Mellora de Camiños Municipais 2019-2020»

O Goberno do Socialista José Miñones podería perder parte da subvención da Xunta de Galicia do “Plan de Mellora de Camiños Municipais 2019-2020” por incumprir prazos na execución e xustificación

• A subvención correspondente ao exercicio 2019 xa debería estar executada e xustificada antes do pasado 16 de setembro

• O primeiro lote, pendente de adxudicación definitiva, aprobouse aínda o 5 de setembro; mentres que a adxudicación do segundo non se realizou, o que demostra o baixo interese polo rural

Ames, 25 de setembro de 2019

O Partido Popular de Ames leva advertindo moito tempo do escaso interese polo rural do goberno encabezado polo socialista José Miñones, de aí que o Grupo Municipal Popular de Ames rexistrara unha serie de preguntas relacionadas coas obras do camiño de Firmistáns á estrada de Tarrío e do camiño a Ínsua, na praia fluvial de Tapia. Dúas actuacións incluídas no “Plan de Mellora de Camiños Municipais 2019-2020” que están subvencionadas ao amparo da resolución do 28 de decembro de 2018, pola Axencia Galega de Desenvolvemento Rural: ente público da Xunta de Galicia.

No caso de Ames, o importe máximo da subvención asignado  para os exercicios 2019/2020 é de 21.591,00 € por exercicio. Un total de 43.182 €.

O expediente de licitación de ambas obras de mellora aprobouse polo Tripartito, na Xunta de Goberno Local, o pasado 4 de xullo de 2019; publicándose a licitación do mesmo (expediente 2019/C003/000004) na Plataforma de Contratación do Sector Público, mediante anuncio do 10 de xullo de 2019.

A licitación, mediante procedemento aberto simplificado, consta dos seguintes lotes:

• Lote 1: Camiño de Firmistáns á Estrada de Tarrío
• Lote 2: Camiño a Insua (Praia fluvial de Tapia)

Na información publicada na Plataforma de Contratación do Sector Público aparece como único lote adxudicado o primeiro, publicándose dito acordo o 6 de setembro de 2019. O acordo tomouse en Xunta de Goberno Local con data 5 de setembro, adxudicándose a obra á empresa SYR-AMG S.L.

Respecto ao segundo lote, aínda non se puido adxudicar. A empresa que mellor puntuación obtivo foi a mesma que conseguiu a adxudicación do primeiro lote (SYR-AMG S.L.); pero nesta ocasión, o Programa de Valoración de Ofertas Económicas en Contratos e Concursos empregando para valorar as ofertas, especificou que a oferta presentada atópase en baixa temeraria.

Para ambos lotes licitados, no apartado 6 do cadro de características de cada lote, recóllese o seguinte prazo de execución parcial: Antes do 10 de setembro de 2019 debera terse executada polo menos a metade do importe total adxudicado, á fin de poder xustificar en prazo a axuda concedida para a primeira anualidade pola Axencia Galega de Desenvolvemento Rural para a realización desta actuación.

Un prazo de execución parcial necesario, xa que, segundo o Artigo 12 da citada resolución da Axencia Galega de Desenvolvemento Rural, o prazo límite para executar e xustificar as inversións correspondentes á anualidade 2019 será o 16 de setembro de 2019; e o feito de non xustificar correctamente esta anualidade suporá a perda parcial do dereito ao cobro da axuda polo importe non xustificado.

Ante a desidia mostrada polo goberno do socialista José Miñones, e a posible perda de parte da subvención para financiar ditas obras, o Grupo Municipal Popular solicitou ao goberno de Ames, a acreditación sobre o cumprimento do prazo de execución parcial recollido no apartado 6 do cadro de características de cada lote, así como o importe da axuda concedida e perda, no suposto de que así sexa, correspondente á primeira anualidade pola Axencia Galega de Desenvolvemento Rural para a realización desta actuación.