Licitación Videoacta Ames

O Grupo Popular de Ames descobre que a vídeo-acta non ten validez xurídica, non ten operativas a maioría das funcionalidades e o código interno é propiedade da empresa e non do Concello

• O Goberno Socialista contratou a dedo, se publicidade e sen concorrencia competitiva o servizo en marzo de 2016 por 21.417 euros, e o pago realizouse por Decreto de Alcaldía en novembro

• O pago realizouse a unha empresa madrileña sen asegurarse de que as funcionalidades estaban activadas. Agora, sácano de novo a licitación quedando deserta. Nin sequera se presentou a empresa contratada a dedo no ano 2016

Ames, 26 de outubro de 2019

O despropósito na contratación de servizos polo Goberno Socialista de Ames parece non ter fin. Esta vez tócalle ao servizo de vídeo-acta contratado o pasado 30 de marzo de 2016 para a implantación do sistema de gravación das sesións plenarias do Concello. Un servizo que debería facilitar e axilizar a xestión das actas municipais pero que non cumpre ningunha das expectativas e tan só se limita a gravar imaxe e son.

Un sistema que foi adxudicado a dedo en marzo de 2016, que non ten validez xurídica e no que non están operativas a maioría das funcionalidades tales como o servizo de dar soporte e almacenamento a todos os vídeos xerados nas sesións dos Plenos; vídeos que deberan servir como actas oficiais, e que se atopan aloxados nos servidores municipais sen posibilidade de que se poidan reproducir parte dos seus contidos e funcionalidades, posto que dita información forma parte do código interno “Vídeo-Acta TM”, o cal é propiedade da empresa e non do propio Concello.

Ao tratarse dun sistema integral, para que funcione a pleno rendemento é necesario levar a cabo unha serie de servizos que non se dispoñen, tales como o servizo de mantemento e soporte da aplicación, así como o servizo de hosting e almacenamento en servidor externo que permita a reprodución das vídeo-actas con todas as funcionalidades da aplicación. De feito, basta con entrar na web municipal, acceder ás sesións plenarias e comprobar a ausencia das URLs para localizar as vídeo-actas.

Como o Concello está operando sen o servizo de mantemento preciso para solventar as incidencias que se poidan producir e, sen o hosting e almacenamento que permite salvagardar os vídeos gravados, sen ocupar espazo no servidor do Concello, non lle quedou outra opción aos Socialistas que plantexar a licitación do servizo cunha única empresa: A empresa propietaria exclusiva dos códigos fonte.

Con este obxectivo, o Goberno Socialista, aprobou o pasado 12 de setembro o expediente de licitación mediante procedemento negociado sen publicidade o preciso servizo de mantemento do sistema de vídeo-acta e do hosting e mantemento externo, invitando a presentarse á licitación á empresa propietaria dos códigos, a cal decidiu non presentarse.

Ante esta situación, o Goberno non tivo máis remedio que declarar deserto o expediente de contratación, polo que o sistema continuará funcionando sen mantemento e coa posibilidade de que continúen os problemas na reprodución de parte dos contidos.

Con todo isto, o Grupo Municipal Popular preguntou ao Goberno local se a situación actual afectaba dalgunha forma ao sistema de autenticación legal establecida e da firma dixital correspondente, así como se a situación actual permite a non manipulación das gravacións dende o comezo da mesma ata a súa sinatura mediante certificado dixital da Secretaría.

A resposta do Goberno Socialista, mediante escrito o 22 de outubro, vén a confirmar as sospeitas dos Populares. Segundo o escrito, e tras máis de tres anos dende a sinatura do contrato, temos coñecemento de que o sistema de vídeo-acta non pode ser empregado, polo momento, como sistema substituto á acta escrita.

Por último, os Populares lembran que esta nova “chapuza” dos Socialistas, custou á veciñanza 21.417 euros, pagados por Decreto da Alcaldía en novembro de 2016. Un pago por un servizo que non se levou a cabo e que, ao entender do Grupo Municipal Popular, só se pode solventar levando a bo termo o proceso de licitación do servizo que acaba de ser declarado deserto.